CHYEJU DUM HKUNGGA

Nat galaw ai n re ngu ai hpe sanglang dan mayu nngai ....

Yesu Hkristu si hkam ya ai gaw, Yubak mara ngarai lam hta myit mada shara n nga mat sai ni hpe htani htana asak jaw ya lu na matu, si hkam ya ai "Gawng Malai Hkungga" rai nga ai.

Kadai mung kade a htunghking ningli hte Yesu Hkristu hpe (Contextual) ginra masa hta hkan ai makam hkringhtawng hte, n kam n sham shi ai sai daw ai chyen ni a matu kasi ningli kaja tai lu na matu ndai "Mangai shagu Hkungga" nawng jau ai lam gaw grai ahkyak nga mali ai re ....

Ndai Chyinghtawng Pa Buga hpung ni gaw shaning shagu ndai hku galaw ma ai, laika ka ai wa hku nna mung 2 ning sa shang lawm lu nngai, lamang hta lit mung shatsam hkrum nngai. Dai majaw, ndai shakawn hkungga nawng jau ai poi gaw, "Mara raw Gawng malai Hkungga" nawng jau ai poi n rai malu ai ngu mu mada nngai ....

Karai Kasang anhte hpe hpan da ya ai, Namsi namsaw amyu myu, Nhprang sut rai amyu myu, Dusat du myeng amyu myu, Mawdaw Jak rai amyu myu, ngwi pyaw hkam kaja ai chyeju, Kashu kasha mayat maya maden zinghka re chyeju ni hpe hti ndang tsun n ma re lam ni hpe, ta tut hkrang shapraw let, "Chyeju Dum Shagu Hkungga" nawng jau ai lachyum hku galaw ai rai malu ai.

Ndai zawn rai galaw ai a majaw, shanhte buga gaw nsi naisi mung grau ring wa ai, U, Wa, Yam nga ni mung grau mayat wa ai, hkam la ai chyeju grau grau jat wa ai nga nna sakse mung hkam nga ma ai.

Dai majaw, chyinghtawng Saga Pa buga hpung ni a "Chyeju Dum shagu Hkungga" sak nawng jau ai lamang hte seng nna, dinglun ai ni mung nga na nhten, bai nna n-gun lu ai ni mung nga na nhten, ngu nna ndai lam hpe sanglang tang shana dat nngai law. Lama na chye mayu ai lam naw nga yang naw san jahta mai ai lam mung numhtet dat nngai law.