"SHAMAN GA"

" Shaman Ga " hpe "Shaman ga", Ngut jang bai "Shaman ga" ..

Ga Machyan
                  Moi anhte a buga ginra hkan na Ji woi Ji wa ni a shakram hkat hkat ai ga gaw, " Ai ei .... Ndang si na wa e, Sharaw e htim na wa e .... Gwi daw nang mung naw nga a hka i " nga nna shada da hkrum ai shaloi, kabu gara shakram hkat chye ma ai, dai gaw hku hkau dik sai lam re da. Tinang a kashu kasha ni hpe yup jasu ai shaloi mung, matsa mawa ga hte jasu chye ga ai, ga ngwi ga pyaw galoi nau n na ga ai nga lai wa saga ai.
Rai timung, daini makam masham prat du ai shaloi dai gasi ni nau n na mat wa sai, Hkrum ai hte ga ngwi ga pyaw ni shaga nna shakram hkat let, bai hka na rai yang mung, "Shaman Ga" bai tsun rai nna she shakram hkat re majaw, Yawng gaw shaman wunli ga hpring tsup shajang wa ai hpe mu mada lu ai majaw grai n-gun lu nngai.
Dai majaw Wunli shaman hkringhtawng lu ai amyu ni she rai ga ai hte maren, Wunli shaman ga jawm tsun hkat rai nna tinang a Dinghku, tinang a asak hkrung lam hpe shangang shakang sharing shachying let, kabu gara lu na maatu "Shaman Ga" ngu ai gabaw hte n-gun jaw tang madun mayu nngai law.

1. Ga Shaka Dingsa hta mu lu ai "Shaman Ga"

(1)    Karai Kasang gaw, shi hpan hpajang da ai lam ngut kre nna majoi kabai da ai n rai, Yawng mayawng hpe bai nhtang shaman ya nga ai. Dai gaw shi hpan da ai shinggyim masha hte dusat du myeng ni a matu akyu rawng asung shang na matu mung, Shi hpa da ai lam ma hkra hta wunli hpring tsup nga na matu mung, Shi a hpung shingkang grin nga lu na matu mung rai nga ai ( NN. 2:2-3 ).
(2)    Karai Kasang gaw, Abraham, Isak, Yaku ni hpe shaman ya ai, Dai gaw Karai kaw na masha hpe shaman ya ai rai nga ai. (NN.12:1-3, 32:23- 30) Lamu Kasa gaw, Yaku hte kamu hkat nna shaman chyeju hpyi la ai zawn, Daini anhte mung Jaw kaja ai hku n woi uphkang ai Mungdan asuya galaw ai wa hpe sha n shaman ya yang gaw n mai dat ai manat dik dik rai ra nga ga ai.
(3)    Karai Kasang lata san da ai masha ni gaw, tinang a kashu kasha ni hpe bai Shaman ya ai. ( NN.27:1-40, 48:15-16, Bu.6:24-27 ) Ndai gaw masha shada shaman ya hkat ai lam rai nga ai. Karai Kasang kaw na Shaman hkringhtawng lu ai ni shaman ya ai lam rai nga ai.
(4)    Masha kawn masha hpe shaman ya ai, Kanu kawa ni gaw, kashu kasha ni hpe shaman ya ai, Abraham mung shi kajan Rebeka hpe shaman ya ai hpe mu mada lu nga ai. ( NN.24:60 ) Daini anhte galaw nga ai Hkungran poi ni hta mung, sharung shakau kungdawn lit amyu hte shamn ya nga ga ai, dai hte maren Hkungran ya ai lam mung, majoi lu jahkrum lu matut ya daw sha n mai ai, La nnan hte Num nnan hpe ngwi pyaw ai Dinghku nnan tai wa manu ga law ngu nna du sa ai ni yawng jawm shaman ya ra nga ga ai.

2. Ga Shaka Ningnan hta mu lu ai "Shaman Ga"

(1)    Yesu shi a Sape ni hpe tsun shatsam shaleng dan nga ai. Shanman ga hpe tsun ai gaw asum n re, tsun shagu amyat rai nga ai.( Mt.10:12-13) Hpyen wa hpe tsawra na lam tsun ai ( Lk.6:28 ) Anhte gaw bawng lu rim ai shaloi galoi n sat ai bai dat dat re lam gaw Mungkan a hpyen tara rai nga ai. Dai majaw mung Karai Kasang gaw anhte a maga de aten hpring tsap ya ai rai nga ai.
(2)    Kasa Pawlu tsun ai Hpyen wa hpe shaman ya na matu tsun ai ( Rm 12:14 ). Daini anhte Myu Wunpawng sha ni gasat nga ai majan hta, zingri zingrat aroi arip nau hkrum sha ai majaw, shaman ga lu tsun ya na matu gaw n loi na re, masin si hkra akyu hpyi ai ni mung nga na saga ai, Rai tim, majan ndai hpe woi awn nga ai gaw, 2Hkhk.Lb.20:15 hte maren majan madu gaw Karai Kasang she rai nga ai, "Matai htang mayu ai myit hte akyu n hpyi ai sha, Shaman ga hte akyu hpyi yang" anhte a atsam hte n dang di lu ai majan hpe Karai gasat shamyit kau ya na lam nga ai.
(3)    ( 1 Petru 3:9 ) hta mung Shaman ga ngu ai gaw sali wunli re majaw, dai hpe anhte gaw galoi mung atsun nga na matu rai nga ai. Tinang a nta masha ni hpe mung, yup rawt ai kaw na Phone matut hkrup ai manaw manang ni hpe mung, Shaman shakram ga tsun na matu lit n li ga ngu n-gun jaw dat mayu nngai.

3. Daini anhte a Shingwang kata na "Shaman Ga"

(1)    Htunghking ningli kata na Shaman Ga
Anhte Chyurum Jinghpaw Wunpawng myu sha ni gaw, moi moi kaw nna, Wanmang dapgawp makau e dung, Jahkum shatsup da sai Kahtang hpe lapai maga jum, lahkra maga dinghkru magap hpai rai nna, mayu she galaw sharai la hkra rai, "Shaman mang gala Ga" hpe tsun shagawp ginlen hkrat wa ai amyu ni rai ga ai. Dai "Shaman mang gala ga" hpe tsun ngut ai hpang de a makau kaw jawm madat dung lawm nga ai ni gaw, Um law .... Rai sai law .... dik wa nu ga law .... ngu nna yin la , yau la , hkam la rai yu hkrat wa ga ai.
Dai gaw Karai Kasang jaw da ai “Hkringhtawng Wunli Shaman Ga” rai nga ai, ndai shaman ga hpe hkam la ai ni kadai kashu kasha ni mung, lu sut lu su, nga mu nga mai, sut ring gan chying ai chyeju wunli ni hpe hkam la shajang nga ma ai hpe mu mada lu nga ga ai. Dai majaw, ya anhte Karai Kasang hpe hkap la kam sham sai kashu kasha ni mung, dai hkringhtawng hpe n shamat kau ai sha, matut nna Shaman ga hpe tsun ginlen hkat rai nna kunghpan galu kaba wa ra nga ga ai re.
(2) Hpung magam gun ni a shaman ga
Ngai ndai gabaw hte seng nna shara tsawm ra law law hkan htawn tsun sharin len shalai ai lam galaw nga ding yang rai nga nngai. Kalang mi mare kahtawng langai kaw gaw, Hpung masha langai mi rawt sa wa nna, Sara e .... Shaman ga gaw Hpungup sara ni sha tsun ai baw n re ni nga san wa ai ....
Rai sa ;- Hpungup sara ni shaman ai "Shaman Ga" gaw 'Kawa - Kasha - Chyoipra ai Wenyi' ngu ai mying ningsang hte, Lata mara nna shaman ya ai re. Anhte yawng a shaman ga Mang gala ga gaw dai hku n re ai, "Ngwi pyaw nga u ga, Hkam kaja u ga, Lu sut lu su u ga, mayat maya wa u ga, awng dang u ga, Karai shaman ya u ga, Chyeju kaba sai, shaman chyeju law law lu u ga" ngu tsun ai baw re .... ngu nna bai tsun jahpra dan nngai re. Ning ngu tsun yang pawt wa na masha gaw mi n nga nhten ! ....

Ga Hpungdim
Mungkan amyu bawsang shagu hta, Shaman Ga nga nga mali ai re, kalang marang anhte gaw, shada chyeju dum ga tsun hkat chye ga ai, nkau kau chyeju kaba sai yaw ngu yang, "N ra ai gaw e" .... nga tsun chye ga ai, dai gaw manang wa jaw ai shaman chyeju hpe ningdang kau ai hte maren sha re, Au lo .... Um law .... Amen .... ngu nna yin la, yau la ra ai rai nga ai, a katsi nga madat shalai kau jang gaw hpa mung n lu na sha re.
Dai majaw, Karai Kasang anhte hpe jaw da ya sai shaman chyeju law law hpe anhte bai n ginlut kau u ga .... Shaman Ga chyeju hpe mahkyu, Shaman ga hpe tsun rai nna, Shaman Wunli hpe dagraw, hkringhtawng hpe shachyaw rai rawt jat kunghpan galu kaba wa saga law ngu nna Shaman Wunli ga hte shatsam n-gun jaw dat nngai law.

N DUM SAI KUN NAU NAU

Moi ngai naw kaji ai ten hta

Ngai na kanau hpe ayan ba ,

Atsawm n woi yang nan n mai

Nu a shingna katut sha na tai,

Ya daini Kanau jan kaba sai

Ngai kahpu hte tsan mat ai,

Ngai nau jan e .. bai wa rit le

Ahpu grai dum nga sai lu e ,

Ngai nau jan hpe Hpu tsang ai

Mai gan jan gaw nang hkum tai,

Wunpawng shadang ni hte sha

Dinghku de na hpe Hpu myit mada,

Chyasam kahkau n ra nngai lu

Lawu ga na kahkau Hpu n ju ,

Ngai kahpu a chyeju hpe dum jang

Jahtawng n htu ai kaw hkum hkan nang,

Ya chyinghkai Nu dinggai sai majaw

Nau nau nang nta de lau bai wa rit yaw ....

2013 NING NA LAKLAI AI LAMIK KUMLA

Bang Ngu mare makau na nawng wa 2013 ning December hta n myit mada ai ya na zawn Hkyeng mat ai rai nga ai. Dai majaw 2013 / 12 / 31 ya shani Hpung masha ni hte nawng makau kaw shat she shadu sha hkra, akyu hpyi hpawng kaba sa galaw dat ai majaw Hka nawng gaw bai san wa rai nga ai.

Ya na zawn akyu jawm hpyi ai Bat mi na ai hpang Ganda Jan Latung Ying Htang hkan nu ni a nta n myit mada ai shani chyingtung e hkru mat ai lam na chye lu ai. Dai shani kaw nna ahka mung grau san mat sai re nga tsun dan ma ai. Lama wa akyu hpyi n galaw mare ting hkru mat na masa nga ai nga nna mung Hpungtau ni maram ma ai. Dai hkru mat ai nta masha ni hpe n-gun jaw ga tsun nna kyu hpyi ya nhtawm, alu kumhpa mung karum kau da nngai.

           Dai hpang 13-14 / 1 / 2014 ya laman hta Bang Ngu buga hpung masha ni hpe Chyum Laika sharin ya nngai. Ginra masa hta hkan nna Ka-ni yi galaw sha ra ma ai rai tim, Lusha na matu n rai, dut sha na matu re da .... N rau tim n-gun mi alu sa jawm madat la ma ai. Shanhte tsun ai gaw, Zaiwa ga hte sharin hpawng n galaw ga ai majaw, ndai kalang Zaiwa ga hte mungga lu madat ai grai n-gun lu sai nga ma ai, Karai Kasang a chyeju nan rai nga sai.

SHINING NNAN CHYEJU SHAKAWN HPAWNG

1 / 2 / 2014 ya shani gaw Janghkang Kawngshan mare kaw na Zinghtung La Htoi hkan nau ni a shaning nnan chyeju shakawn hpawng hta wa du shang lawm kau da, Mungga n-gun jaw ya nngai.

2K PADANG SECTOR DE CHYUM LAIKA SA SHARIN

27-30 / 1 / 2014 ya laman hta, Pangwa ginra "2k Of Padang Sector" 256 Dap Nawng daju nga ai Post kaw ayak ahkak du lung wa nna Chyum Laika sharin ya na matu saw shaga ma ai majaw, wa du sharin kau da lu nngai.

YANGWU BUGA WA LA NI A (3) LANG NGU NA SHARIN HPAWNG

24-25 / 1 / 2014 ya shani gaw, Mungmau Ginwang Yangwu Buga Hkalup hpung Kawa wala ni a (3) lang ngu na La sharin hpawng hta, "Sakhkrung lam nnan ngu ai gabaw hte n-gun jaw , sharin lawm sai.

KAJA AI AMU GALAW NA, ANHTE N HKIT N TSANG NGA GA

21 - 23 / 1 / 2014 ya laman hta Mungbaw Wingseng Buga ni a 2014-2017 ning laman na Buga Hpung Kongsi magam gun ni hpe ( Gal 6:9 ) hte Chyum laika sharin, n-gun jaw shang lawm kau da sai.

KAJA AI AMU GALAW NA, ANHTE N HKIT N TSANG NGA GA

( Gal.6:9 , 2Htes.3:13 )

                                                                                      Rev.Saulang Chang Yaw

Ga Nhpaw

                   Shawng nnan Karai Kasang gaw, sharin achyin ginlen ya ai magam amu hta, Ngai hpe jai lang nga ai majaw chyeju shakawn ai, Dai hta n-ga, ndai Chyum daw hte maren n-gun jaw htawn tsun sharin lawm na matu, shatsam ya ai Mungbaw Buga magam gun manang ni hte Hpung masha ni yawng hpe mung n dang tsun tsun hkra kabu chyeju dum nngai re. Dai majaw Karai Kasang a chye na hkawn hkrang shangun ai Wenyi chyeju kumhpa hte, Karai a jai lang akyu jashawn hkrum ai Wunli wungau gaw, Nu wa ni yawng a ntsa hta tut nawng anga nga u ga law.

1.      Shingdu Labau Kadun

          Galati ngu mying ai gaw, Greek (Heleni) hte Roma Hkawseng mungdan ni hpe hpya ayai kau ai hpang, tsaban jaw shaning law law lai ai shaloi, Asi kaji (Asia Minor) kaw sa de nga ai, Gauls (sh) Celts amyu masha ni hpe lakap nna shamying ai rai nga ai. Roma ni up ai aten hta Galiti ginwang gaw, Asi kaji ka-ang daw ( Ya Turkey mung ) hta shang lawm da nna, dingdung dingda deng 250 hte sinpraw sinna deng 175 dam ai shara rai nga ai.

          Roman Empire a shawng na aten hta, Asia Minor na hpe awmdawm ahkaw ahkang hte uphkang ai mungdaw ni gumhpawn da ai shara re. Dai shara hpe 3rd Century B.C daram hta Roman Empire a Hkawhkam Augustus wa uphkang wu ai, dai ten hta ginwang law law garan mat wa ai majaw, Kasa Pawlu a prat hta Roman Empire ni masat ai Galati gaw moi na Galali ngu masat ai shara a dingdung daw, dingda daw na Pisidia, Sinpraw dingda daw na Lycaonia, dingda daw na Phrygia mungdaw ni lawm ma ai.

(1)    Laika ka ai wa ( The Author )

          Galati 1:2, 5:2, 6:11 ni hta , Galati laika hpe Kasa Pawlu ka ai re ngu tsun da   nga ai.

(2)    Laika ka ai shara hte Shaning ( Place & Date )

                      Galati Laika hpe Kasa Pawlu ka ai shagun laika re ngu nna Chyum           ninghkring yawng hkam lama ai rai tim, “ Galati mung na Hpung ni ” ngu ai     ga yan a majaw Chyum ninghkring ni gaw, Kasa Pawlu Galati laika    hpe    Ehpesu mare kaw A.D 53-56 (sh) Makedoni mung kaw A.D 56 hta   ka ai re ngu hkam la ma ai.

(3)    Laika ka ra wa ai lam

                    Kasa Pawlu Sasana galaw ai a majaw,galai shai wa ai hpung masha         ni hpe, Yuda Hkristan sharin sara ni gaw, Kasa Pawlu Galati hpung e n    gannga ai aten hta shut shai ai hku sharin shaga ya ma ai. Shanhte sharin      achyin ai hta;- (a) Tarai maigan langai Hkristan tai          mayu yang, matu gadoi ra ai, Yuda poi shingra ni galaw ra ai (1:6-9, 4:17-21, 5:7-12, 6:12-13 ). (b)         Kasa Pawlu gaw Yesu a Sape majing n re, Masha ra hkan nna sha hkaw    tsun chye ai wa re, (1:10 ff) nga sharin ma ai. Dai zawn rai shut shai ai    hku sharin achyin ai lam ni nga nga ai aten hta Galati laika hpe ka ai rai nga ai.

(4)    Galati Laika a yaw shada ai lam

                    Yuda Hkristan sharin sara ni sharin shut da ai hpe bai sanglang dan        namatu ka ai re. (a) Shi gaw Yesu Hkristu a chyeju hte Karai Kasang kaw na, daru magam ahkang aya lu ai Kasa re ai lam sanglang dan na matu, (b)        Shi htawn tsun ai Mungga hta sha manoi nga na matu yaw sha let ka dat ai    laika rai nga ai.

                   Daw Kaba 6 rawng ai Galati laika malawm ni kaw na (6:9) shang   lawm ai daw hta gaw, Shada da a lit hpe gun hpai shingtau hkat ra ai lam           hpe madung tsun mayu ai rai nga ai. Dai majaw anhte mung ndai Chyum   daw hpe atsawm sha chye na hkap la hkan nang hkan sa yang shaman chyeju    lu na re.

2.      Galati (6:9) hpe Shaleng ai lam

        Kaja ai amu galaw na, anhte n hki n sang nga ga: kaning rai nme law, anhte myit n yaw ga yang gaw, aten ladaw du jang, anhte dan la na ra ga ai.

          Wenyi hta ahkawm nga nna Wenyi hta gat hkai ai ni a matu Wenyi asi gaw tawk hprut tak la n lu ai lam rai nga ai (Gal 5:22). Kamsham ai masha langai mi , majoi mi hku nna sha shaning na na madu Karai Kasang a sasana magam hta kangka sadi sahka ai hte, tinang akyu n tam ai sha, apnawng daw jau lai wa rai tim, Madu kaw na shaman chyeju hkyep mi mung dan dan leng leng n hkam la yu ai lam byin chye nga ai. Kasa Pawlu nnan kamsham wa yang na hta grau nna shi a asak aprat jahtum daw de manghkang ni,myit htum myit chyum hkrum ai lam ni, zingri zingrat hkrum ai zawn, anhte mung amyu myu hkrum hkra chye ga ai.

          Puritan (pyu-ri-tan) Hkristan hpung, Sanpra masha John Brown mung ndai lam hte seng nna, ka da nga lu ai, "Hkriatan law law gaw, ma kaji ni hte bung ma ai, Lani jan e sha hkai nna , dai shani jan nan bai dan la mayu ma ai" nga ai. Gat hkai ai lam hpe aloi sha jin dum wa nna dan la na hpe sha myit katu nga ma ai. Ya hka htung htu nna ya hka san ja lu n mai, ai hpe chye na yang Karai Kasang a magam bungli hta apnawng ai shaloi grau hkam sharang lu na re.

          Greek ga enkakeo (lose heart) gaw myit daw myit hten ai ngu ai rai nna, ekulo (row weary) gaw myit hki litli dum ai lam rai nga ai. Ndai 2 a lachyum hpe anhte yawng hkam sha chye ga ai, dai rai yang (I Kor 15:58) hte gaw nhtan shai mat saga ai kun ? myit yu sawn yu dinglik yu ra nga ai.

          Kalang lang Wenyi lam hta hki ba ai n rai , mai kaja ai bungli lama mi mung n galaw ai majaw, lagawn myit shang ai she rai nga ai, Kalang lang manghkang gaw, Wenyi lam hta sawt ai rai nna, madat la ai hte shaga jahta ai gaw law tim, tatut galaw ai gaw n law re lam ni mung byin chye nga ga ai. (Yaku 1:22)

          Rai tim, kamsham ai masha langai mi hku nna, mai kaja ai bungli hpe sawt ai myit n lawm ai sha, tatut shakut shaja nga ai rai yang, aten ladu du jang dan la na ga sadi Madu Karai Kasang jaw da sai. Ndai kaw htani htana asak dan la na ngu nna Pawlu tsun ai gaw, hkye hkrang la hkrum na re ngu nna tsun mayu ai n rai, Shaman chyeju hte htani htana shagrau kumhpa shabrai hkam la na hpe tsun nga ai. (Gal 6:8) Matut nna Kasa Yawhan mung ndai lam hte seng nna sadi jaw shadum nga ai . ( 2 Yawhan 1:8 ) Anhte galaw da ai amu hpe nanhte n shamat kau myit dai sha, nanhte hkum hkum re ai shabrai hpe hkam la lu myit ga, tinang dai sadi nga mu.

            Kasa Pawlu gaw Madu Yesu Hkristu a sasana magam bungli hta hpa majaw, n hki n sang na hte myit n yaw na lam tsun ai, Miletu panglai hkingau de du ai shaloi Ehpesu Hpung salang ni hpe Pawlu tsun ai gaw, ( Kasa 20:24 ) hta mu lu nga ai.

          “Ngai chyawm gaw, nye a gat shadu ra ai lam hpe mung, Karai Kasang a chyeju kabu gara shiga lam sakse hkam na matu, Madu Yesu kaw na ngai lu la ai magam hpe mung, ngut hkra gun hpai lu na rai yang, nye asak hpe pyi lahpawt nngai n rai.”

            Dai majaw anhte mung nadai ( Gal. 6:9 ) hta Kasa Pawlu tsun n-gun jaw ai hte maren, Israela amyu sha ni a Nam mali kata na hkrun lam zawn, aput angun n ngu ai sha Karai Kasang naw jai lang mayu nga ai ahkying aten hte yang sharawng shara, shang lawm apnawng daw jau gun ra nga ga ai re.

          "Kaning rai nme law, anhte a Madu Yesu a man e, shi a bai du ai hta, anhte a myit mada shara, kabu gara shara hte gumrawng na janmau gaw, hpa mi rai nga a ta? Nanhte nan dai rai nga myit dai, n rai myit ni?" ( I Htes 2:19 )

3.       Kaja ai amu galaw yang na akyu hte N galaw yang na asak         hkrung lam           hpe kaga Chyum daw ni kaw mung law law mu mada          lu nga ai.

(1)     Kaja ai amu n galaw jang dam mat brun chye nga ai ( Shk.Kd 14:3 ).

(2)     Yehowa hta shamyet shanat nna kaja ai amu galaw ra ai (Shk.Kd 37:3).

(3)     Karai Kasang n nga ai nga ai gaw Kaja ai amu n galaw ai ni re ( 53:1 ).

(4)     Pyaw pyaw nga lu ai gaw kaja ai amu galaw nna re ( Hpj.3:12 ).

(5)     Kaja ai amu galaw na matu sharin la ra ai ( Esaia 1:17 Titu 3:14 ).

(6)     N kaja ai amu galaw jang si ari re ( Ezk.18:18 ).

(7)     Yesu a kaja ai amu galaw ai sakse dan dawng wa sai ( Kasa. 10:38 )

(8)     Kaja ai amu kada mung n galaw ma ai majaw je yang hkrum na (Rm3:12).

(9)     Gaida jan ni galaw ra ai kaja ai amu ( I Timo 5:10 ).

10)    Chye ning len n galaw ai wa gaw, yubak mara re ( Yaku 4:17 ).

11)    Hkam sharang let kaja ai amu galaw ai rai yang akyu lu na ( I Pet 2:20 ).

12)    Karai Kasang hte seng ai wa gaw kaja ai amu galaw nga ai ( 3 Yn 1:11 ).

4.     Kaja ai amu galaw na ni myit dum da ra ai lam.

          Titu 1:6-9 hta tsun da ai hte maren Hpung a myit su Salang ni hkan sa ra ai, koi yen ra ai, Sadi ra ai lam hpe shadum jahprang da ai hpe mu mada lu nga ai.

@- Mara shagun shara n nga hkra, tsun shara n nga hkra asak hkrung ra nga ai.

@- Karep nra n mai shalaw ai, Lakying n mai nga ai .

@- Kabring kabrawng n mai nga ai. Chyaru n len na, Gumle gumlau n mai ai.

@- Tinang gaw makam lam hta grai shakut sai rai tim, Tinang a Dinghku nta             masha ni n kam n sham yang n mai ai.( IKor 7:14, ITimo 3:5, )

@- Tinang hkum hpe hkang dang ai wa rai ra nga ai.

@- Myit gring ra ai, Si si re ai wa rai ra ai.

@- Manam daw ai lam hpe ra sharawng ai wa rai ai.

@- Sharin shaga maka rawng ai wa mung rai ra nga ai.

@- Ga law ga la myit n rawng ai, Sumnung shingdi rai asak hkrung ra ai.

@- Ladu shalai law hpa myit marin ai wa n mai rai ai.

@-Sin dawng katawt, myit kadun ai wa n mai rai ai.

@- Dinghpring ai lam hta hkan hkawm ai wa rai ra nga ga ai. ( ITimo 3:6-8 )

Ga Hpungdim

                             Yesu tsun ai, Nye a kandang hpe hpai mu, tsang ai, hpai loi ai, nga nna shi saw shaga nga yang, ( Mt 11:29, Shk.Kd 118:17 ) Shakawn Kungdawn sara zawn ngu nna, dinghta asak hkrung lam garai n htum shi yang kaja ai amu hpe lu ai n-gun atsam, ahkying aten hta kangka lamla mangan nga rai hkra jawm shakut ra nga ga ai law.